Likhang-Salin Na Modyul Para sa Disiplinang Calculus sa Ika-12 Baitang

  ABSTRAK: Ang pag-aaral na ito ay tumutukoy sa kaangkupan, kakayahan, at katanggapan ng modyul sa Calculus na binalido ng 30 field experts sa disiplinang Calculus at Filipino sa piling pampublikong mataas na paaralan sa lungsod Quezon. May 120 mag-aaral na kalahok sa pangkat-eksperimental at 120 na mag-aaral na kalahok sa pangkat-kontrolado. Nakita sa pag-aaral na may saysay o tulong ang pagtuturo ng Calculus gamit ang wikang Filipino. Sa katunayan, may bahagyang pagkakaiba sa post-test ng dalawang pangkat at naipakita rito na ang mas nakakuha ng mataas na mean gain score ang pangkat-eksperimental at nakakuha rin ng mababang standard deviation kumpara sa pangkat-kontrolado na may pinakamataas na standard deviation at pinakamababang mean gain score sa post-test. Mas nakitang nag-perform ng mabuti ang pangkat-eksperimental kumpara sa pangkat-kontrolado. Napag-alaman sa pananaliksik na ang pinakamahihirap na aralin sa Calculus ay ang integral sa pamamagitan ng substitution, integral sa pamamagitan ng mga bahagi, at ang pagkuha ng area sa ilalim ng curve. Bumuo ng isang multilingguwal na modyul gamit ang wikang Filipino, Kastila, at mga hiram na salita mula sa Ingles. Tinaya ng mga eksperto sa larangan na ang modyul ay angkop, kayang-kaya, at katanggaptanggap. Lumabas sa resulta na mas mataas ang naging mean gain score ng experimental na pangkat na tinuruan gamit ang wikang Filipino, na may iskor na 14.27 sa post-test. Nakita rin ang bahagyang pagkakaiba sa pre-test at post-test ng dalawang pangkat, na may mga z-computed values na 2.063 at 2.078. Inirerekomenda ng pag-aaral na isagawa ang kahalintulad na pananaliksik sa ibang disiplina at kumonsulta sa mga institusyong nangangalaga sa wikang Filipino gaya ng Komisyon sa Wikang Filipino. Mungkahi rin ang pagbuo ng leksikon para sa disiplina ng Calculus at ang pagsusuri sa bisa nito sa mga mag-aaral mula sa antas-distrito hanggang pambansa. Mga susing salita: Modyul, Calculus, K to 12, Katanggapan, Kakayahan, Kaangkupan