Pagsusuri sa mga Piling Maikling Kuwento ni Efren R. Abueg: Repleksyon ng mga Isyung Panlipunan

  ABSTRAK: Ang pananaliksik na ito ay naglalayong masuri ang mga maikling kwento ni Efren R. Abueg na tumatalakay sa mga isyung panlipunan, lalo na sa kanyang akdang “Mabangis na Lungsod”, “Sa Bagong Paraiso,” at “Sa Kamatayan ni Tiyo Samuel”, sa pamamagitan ng lente ng isyung panlipunan. Ang pagsusuri ay isinagawa gamit ang deskriptibong pagsusuring pangnilalaman upang matugunan ng pansin ang mga temang nauugnay sa kahirapan, di-pantay na pagtingin sa tao, at ang epekto ng mga estruktural na problema sa buhay ng indibiduwal. Pinili ng mga may-akda ng pananaliksik ang mga akdang ito dahil sa kanilang malinaw na pagtalakay sa mga isyung may kinalaman sa uri ng pamumuhay, karapatang pantao, at ang pakikisalamuha ng tao sa kanyang lipunan. Sa pamamagitan ng pagsusuri ng mga aspeto ng pananaw, tono, damdamin, at mensahe o aral ng bawat akda, itinampok ang paraan ng pagpapakita ng mga akda ng kasaysayan at kalagayan ng lipunan. Ang pananaliksik ay nagpapakita kung paano ang mga akdang ito ay nagsisilbing repleksyon ng mga kontemporaryong isyung panlipunan, na patuloy na may kaugnayan at halaga sa kasalukuyang panahon. Ang mga resulta ng pagsusuri ay makatutulong upang mas mapalalim ang pag-unawa sa mga pangunahing tema ng panitikan ni Abueg, at kung paano ang mga isyung panlipunan ay naipapakita at naipapasa sa mga mambabasa.

Mga Susing Salita: Efren R. Abueg, Isyung Panlipunan, KuwenTuklas, Marxismo, Panitikang Pilipino